Lucas 10:38-42
Ang managsoon nga Marta ug Maria mga suod nga higala ni Jesus. Sa pagduaw sa Ginoo sa ilang panimalay, matag usa kanila nagpakita og lainlaing pamaagi sa pag-alagad kaniya. Si Marta nagkapuliki sa pag-andam og pagkaon; samtang si Maria naminaw sa mga pulong sa Ginoo. Sa kaulahian, mas gidayeg ni Jesus ang gihimo ni Maria kay siya maoy nakapili sa mas bililhong bahin.
Sa estorya, atong masabtan nga ang mas bililhong bahin mao ang pagpakig-uban, ang pagpakighinabi ug, labaw sa tanan, ang pagpaminaw sa mensahe sa Ginoo. Kini mao ang espiritu sa pag-ampo, nga kon ubanan sa dakong pagsalig, maoy makapahimuot pag-ayo sa Dios. Ang pagtrabaho para sa Dios maoy tawag sa matag Kristiyano. Sa ebanghelyo, gipadala ni Kristo ang mga tinun-an aron pagsangyaw sa Maayong Balita. Apan sa wala pa kini mahitabo, gidapit una niya ang mga tinun-an nga makig-uban kaniya (Marcos 3:14). Ang maong panahon sa pagpakig-uban bililhon kaayo aron nga ang kasingkasing ug hunahuna sa mga tinun-an mahisubay una sa kasingkasing ug hunahuna ni Jesus sa dili pa sila magsugod sa pagsangyaw.
Karong adlawa gihagit kita sa ebanghelyo nga magbaton sa mga hiyas sa pagkamaampoon ug pagkamakugihon. Ang makanunayong pag-ampo maoy magsiguro nga ang tanan natong buhaton mahisubay gayod sa kabubut-on sa Dios.
