Lucas 11:27-28
Kining usa ka babaye nahingangha sa mga gibuhat ni Kristo – sa iyang pagpanudlo, pagpanambal ug paghimo og mga milagro. Wala niya malikayi ang paghunahuna unsa kadako ang garbo nga bation sa inahan aning talagsaon nga tawo. Siya nakaingon, “Pagkabulahan sa babaye nga nagsabak ug nagmatuto kanimo!” Gitubag ni Jesus ang maong magdadayeg sa pag-ingon, “Bulahan ang mga tawo nga naminaw sa Pulong sa Dios ug nagpuyo niini.” Kining maong tubag magpahinumdum kanato sa laing okasyon kanus-a si Jesus mideklara nga ang iyang ilhon nga inahan ug mga igsoon mao kadtong magasunod sa kabubut-on sa Dios (Lk 8:21).
Daghan ang maghunahuna nga kining bahina sa Kasulatan makapaubos sa bili sa papel ni Maria isip inahan ni Jesus. Apan, sa pagkatinuod, ang mga pulong ni Jesus naghimo kang Maria nga mas labing dalaygon tungod kay siya man ang labing nindot nga modelo sa usa ka tawo nga magmatinud-anon sa Ginoo. Sa iyang pagka-inahan sa Anak sa Dios, si Maria wala nahimong mapahitas-on; hinuon, nagpabilin siyang mapaubsanon ug masinugtanon sa kabubut-on sa Ginoo.
Karong adlawa gitawag kita nga magbaton sa hiyas sa pagkamatinud-anon sa atong pagkasumusunod ni Kristo. Ipakita nato sa kalibutan nga kita sakop sa pamilya ni Kristo dili lamang sa ngalan kondili sa atong binuhatan.
