The Personification of all Virtues

Wednesday, November 11, 2009

Mierkoles sa Ika-32 nga Semana sa Ordinaryong Panahon

Lukas 17:20-25

Tulo ka managhigala nga lalaki ang nadisgrasya sa ilang gisakyan nga kotse ug nagdungan sa pagkamatay. Didto sa langit, gipasulod sila ni San Pedro ug giingnan: “Pagsuroysuroy mo dinhi sa sulod, pero pagbantay lang gyud mo nga dili mo makatunob og hulmigas kay ang labing gagmay dinhi maoy labing pinangga sa Ginoo.”

Tuod man nagsuroysuroy ang tulo. Apan wala pa matapos ang adlaw, nakatunob na ang usa kanila og hulmigas. Wala madugay, miabut si San Pedro nga may dala nga babaye nga ngil-ad kaayo og nawong. Unya, ang nakatunob og hulmigas gikadena uban sa babaye nga laksot og panagway.

Pagkasunod adlaw, ang ikaduhang lalaki na pud ang nakatunob og hulmigas. Ug mao gihapon ang nahitabo – miabut si San Pedro ug gikadena niya sa lalaki ang laing babaye nga ngil-ad kaayo og panagway.

Ang ikatulo nga lalaki maampingon kaayo sa iyang paglakawlakaw. Milabay ang usa ka bulan nga wala gyud siya katunob og hulmigas. Unya, miabot si San Pedro nga nagdala og gwapa ug sexy kaayo nga babaye. Gikadena niya ang babaye ngadto sa lalaki nga mabinantayon.

Sa pagbiya ni San Pedro, nakasitar gyud ang lalaki: “Pastilan Lord, unsa ba ang akong nahimo nga gipares man ko nimo sa pinakagwapa nga babaye!” Ug mitubag ang babaye: “Ambot lang og unsay imong nahimo. Basta ako, igo ra gyud ko nakatunob og hulmigas!”

Kon makadungog kita sa mga pulong “Gingharian sa Dios” (Kingdom of God), kasagaran kanato maghunahuna dayon og usa ka lugar o palasyo sa Dios diin ang mga matarong o mga sumusunod ni Kristo mopaingon human ining kalibutana. Sa usa ka bahin sa ebanghelyo, si Jesus miingon: “Sa balay sa akong Amahan adunay daghang mga lawak . . . mouna ako pag-adto aron sa pag-andam og luna alang kaninyo.” Bisan tuod adunay basihanan, kining maong pagsabut mahitungod sa Gingharian sa Dios dili igo.

Ang Gingharian sa Dios, una sa tanan, usa ka estado o kahimtang sa kinabuhi diin ang kabubut-on sa Dios maoy maghari. Ang “Kingdom of God” nagpasabut og Paghari sa Dios diha sa katilingban sa mga tawo. In the Lord's Prayer, “Thy Kingdom come” and “Thy will be done” are synonymous phrases. Ang “Gingharian sa Dios” mahitabo kon ang mga tawo magsugod pagpuyo sa kabubut-on sa Ginoo.

Diha sa ebanghelyo karong adlawa, si Jesus miingon, “Ang Gingharian sa Dios anaa uban kaninyo” (The Kingdom of God is among you). Wala siya maghisgot sa usa ka lugar kondili sa iyang Kaugalingon nga nakig-uban sa mga tawo. Jesus is the full embodiment of the Kingdom of God. Ang Paghari sa Dios makita diha sa Iyang kaugalingon tungod kay Siya ang labing masunoron sa kabubut-on sa Dios.

Ngano nga importante man kining maong klase sa pagsabut sa Gingharian sa Dios?

Una sa tanan, kon maghunahuna kita nga ang Gingharian sa Dios usa ka butang nga umaabut pa, dako og puruhan nga balewalaon nato ang “karon”. Moingon kita “Sagdi na lang kon mag-antos kita karon; mahilangit ra bitaw ta pohon.” Tungod niini, dili na kita molihok o maningkamot nga matul-id ang daotang nagakahitabo sa katilingban karon. Sayop kining maong mentalidad. Sa pagkatinuod, ang Gingharian sa Dios usa ka realidad nga nagsugod na og kahitabo karon. “Ang gingharian sa Dios anaa uban kaninyo”, matud pa ni Jesus. Angay natong hatagan og dakong pagtagad ang atong kalibutan ug katilingban karon tungod kay kini ug dinhi magsugod ang Gingharian sa Dios.

Dugang pa niini, ang “Gingharian sa Dios” dili usa ka butang nga human nang daan ug ato na lang dawaton. Hinoon, usa kini ka “dynamic reality” o kamatuoran nga buhi ug nagatubo. Sama kini sa liso sa mustasa nga kon atong alimahan pag-ayo motubo ug molambo. Si Jesus, ang Pulong sa Dios, mao ang liso sa Gingharian sa Dios. Gitanum na Siya sa kalibutan ug sa kasingkasing sa mga tawo. Sama sa liso nga bisan gamay sa pagsugod, ang Pulong sa Dios adunay dakong kapasidad o gahum nga makapausab sa hulagway sa kalibutan. Kita, nga mga sumusunod ni Kristo, adunay dakong papel alang sa katumanan sa paghari sa Dios dinhi sa kalibutan. Wala kini magpasabut nga ang Ginoo kulang sa gahum ug nanginahanglan sa atong panabang. Sa pagkatinuod, walay dili mahimo sa Dios. Apan, Iyang pagbuot nga ang mga tawo gawasnon nga moapil sa Gingharian o Paghari sa Dios. Kini usa ka pagpakita sa Iyang dakong pagtahod sa dignidad sa Iyang mga binuhat.