Mateo 22:34-40
Sa dihang gipangutana si Jesus sa usa ka Pariseo kon unsa ang labing importante sa mga balaod, mikutlo siya sa Daang Kasabotan: “Higugmaa ang Dios sa tibuok mong kasingkasing, sa tibuok mong kalag, ug sa tibuok mong hunahuna” (Deuteronomio 6:5) . Kini ang labing dako ug labing una. Ug ang ikaduha, matod pa ni Jesus, susama niini: “Higugmaa ang imong isigkatawo sama sa imong paghigugma sa imong kaugalingon” (Levitico 19:18). Apan, sa dihang si Jesus misulti gikan sa iyang kaugalingong hunahuna mahitungod sa gugma, siya miingon: “Higugmaa ninyo ang inyong isigkatawo sama sa akong paghigugma kaninyo” (Juan 13:34). Dili masukod ang kalainan niining bag-ong kasugoan ni Jesus.
Nasayod kita unsa nga matang ug unsa kadako ang paghigugma ni Jesus para kanato. Gipaubos niya ang iyang kaugalingon aron kita iyang mapataas. Gipuy-an niya ang kinabuhing kabos aron kita makasinati og kahamugaway pinaagi sa iyang libre nga pagtabang. Nagtudlo siya sa mga ordinaryong tawo, nag-ayo sa mga masakiton ug giyawaan, nagpakaon sa mga gigutum, naglipay sa mga nagsubo, nagpasaylo sa mga sala, ug uban pa. Gitawag kining klase sa gugma og “agape” - gugma nga walay bayad, walay kondisyon, walay pagpihig, ug walay kinutuban. Ang pinakataas nga pagpadayag ning maong gugma nahitabo didto sa krus diin gihalad ni Jesus ang iyang tibuok kinabuhi para sa kapasayloan sa sala sa mga tawo.
Karong adlawa gitawag kita nga magbaton sa hiyas sa pagkamahigugmaon. Atong paningkamotan nga ang atong gugma mahisama gayod sa paghigugma ni Jesus. Magkat-on kita sa pagkalimot sa atong personal nga interes aron nga mabulahan ang uban. Motabang kita sa mga naglisod sa walay paghunahuna nga balosan. Ug magpadayon kita sa paghigugma ug pag-alagad bisan kita masakitan sa atong ginatabangan. Kini mao ang gugma nga tinuod ug Kristohanon.
