Mateo 23:13-22
Ang mga pangulo o mga alagad sa Simbahan gilauman nga magpakita og maayog ehemplo sa saktong pagtoo ug binuhatan. Pinaagi sa ilang maayong paning-ingnan, mahimo unta nga sayon para sa mga tawo ang pagpuyo og matarong nga kinabuhi ug ang pagsulod sa gingharian sa Dios.
Diha sa ebanghelyo, ang mga magtutudlo sa Balaod ug ang mga Pariseo gitawag ni Jesus nga mga “tigpakaaron-ingnon” tungod kay ang ilang gipangtudlo sa mga tawo dili makita sa ilang binuhatan. Imbis unta sila ang magdala sa mga tawo paduol sa Ginoo, sila na hinuon ang nakapahisalaag sa katawhan. Gitawag usab sila ni Jesus og mga “giyang buta” tungod kay bisan ang ilang gipangtudlo sayop. Mas gipalabi pa nila ang mga halad sa templo kay sa templo mismo nga maoy nakapabalaan sa mga hinalad nga mga butang.
Karong adlawa giawhag kita nga maghupot sa hiyas sa pagkamaayong pangulo. Ang usa ka Kristiyano usa ka maayong pangulo. Pari ka man, opisyal sa lungsod, pangulo sa opisina, magtutudlo, o ginikanan, angay ikaw nga magmatarong sa sinultihan ug linihokan aron nga ang imong mga sakop makakita sa saktong dalan padulong sa kamatuoran ug sa Ginoo.
