Mateo 22:1-14
Sa usa ka sambingay si Jesus migamit sa hulagway sa dakong kumbira sa kasal aron ipasabot ang Paghari sa Dios. Ang Ginoo gipakasama sa usa ka amahan sa kaslonon nga nagkapuliki og pagpangandam para sa dakong hikay. Apan, sa dihang naamdam na ang tanan, ang mga tawo nga gipangdapit namalibad tungod sa nagkadaiyang hinungdan. Tungod niini, gisugo sa hari ang iyang mga sulugoon sa pagdapit sa tanang mga tawo nga ilang ikahibalag sa dalan, maayo man o daotan.
Sa teolohiya, ang Paghari sa Dios mao ang katumanan sa kabubut-on sa Ginoo dinhi sa kalibutan. Maisip kini nga usa ka dakong kumbira tungod kay ang mga tawo mapuno man sa kalipay kon magsugod na sila pagpuyo sa mga pamaagi sa Dios.
Kita nga nabunyagan isip mga Kristiyanos nahiapil sa mga dinapit sa kumbira sa Dios. Gihagit kita karon nga magbaton sa hiyas sa pagkamasinugtanon. Ipakita nato ang atong kadasig sa pag-apil sa dakong kumbira sa Ginoo pinaagi sa pagpaningkamot sa pagsunod sa Iyang mga kasugoan sa inadlaw-adlaw. Kon matuman nato kini, makaplagan kita sa Dios nga magsul-ob sa saktong biste sa kumbira sa kasal, ang biste sa katarong.
