Mateo 24:42-51
Si Jesus migamit sa hulagway sa usa ka kawatan aron ipasabut sa unsang paagiha siya muabot sa kinabuhi sa mga tawo. Ang kawatan muabot sa bisan unsang orasa ug sa panahon nga wala nato damha. Sa samang paagi ang Dios muduaw kanato sa walay pagpahibalo bisan asang lugara ug bisan unsang orasa. Pamaagi kini ni Jesus aron sa pagsuta kinsa gayod sa mga sumusunod ang matinud-anon kaniya.
Ang atong tinuod nga kinaiya ug pagkatawo makita diha sa inadlaw-adlaw natong kinabuhi. Pananglitan, makaingon lamang kita nga ang usa ka tawo tinuod nga limpyado kon manglimpyo siya sa iyang panimalay bisan walay gipaabut nga bisita. Ang tawo nga manglimpyo panahon lamang sa imong pagduaw dili tinuod nga limpyado. Makaingon usab kita nga ang usa ka tawo tinuod nga buotan kon magpabilin siyang manggihatagon bisan dili panahon sa pasko. Ang tawo nga manghatag lamang panahon sa pasko dili tinuod nga manggihatagon.
Ang ebanghelyo karon nagdasig kanato nga magbaton sa hiyas sa pagkamakanunayon diha sa pagsunod ni Jesus. Sa tanang lugar ug panahon, maningkamot kita nga magpabilin nga mahigugmaon sa Dios ug sa isigkaingon. Kini ang saktong pamaagi sa pagpuyo sa kinabuhing Kristohanon.
