Mateo 23:1-12
Ang mga magtutudlo sa Balaod ug ang mga Pariseo gisaway ni Jesus tungod sa pipila ka mga rason: Una, tungod kay wala nila puy-i ang mga maayong buhat nga ilang gipanudlo; ikaduha, tungod kay nagbuhat sila og maayo aron lamang mahinungan sa mga tawo; ug ikatulo, tungod kay nagmapasigarbohon sila sa ilang lugar ug pangalan diha sa katilingban.
Sa iyang ministerio publiko, si Jesus takus gitoohan sa mga tawo tungod kay iya mang gipuy-an ang mga maayong buhat nga iyang gipanudlo. Nagsangyaw siya mahitungod sa gugma ug kalooy, ug siya mismo nagtabang sa mga kabos, nag-ayo sa mga masakiton, ug nagpasaylo sa mga sala. Nagbuhat siya og maayo dili aron daygon sa mga tawo kondili aron mapadayag ang dakong gugma sa Dios para sa mga kabos ug timawa.
Sa makausa pa, ang ebanghelyo nag-aghat kanato sa paghupot sa mga hiyas sa pagkamaalagaron ug pagkamapaubsanon sama kang Kristo. Ang mga tawo nga makamaong mag-alagad maoy isipon nga labing dako sa Gingharian sa Langit. “Kay ang magpataas ipaubos, ug ang magpaubos, ipataas.”
