Mateo 20:1-16
Pinaagi sa “Sambingay sa mga Trabahante sa Parasan” gipahimangnoan ni Jesus ang iyang mga tinun-an nga sa ilang pagpangalagad dili sila angay magkwenta sa kadugayon sa ilang pagtrabaho ug sa kadak-on sa ilang nahimo. Ang tanan grasya sa Dios. Bisan gani ang atong kadasig ug kakugi sa pag-alagad tinuklod man sa grasya sa Ginoo. Busa, dili kita angay manghambog ug manukot og ganti sa atong mga nahimo. Ang Dios makamaong magpatigayon sa tanan nga nahigugma ug nag-alagad kaniya.
Tungod kay lain-lain ang atong panginahanglanon, lainlain usab ang matang ug gidak-on sa grasya nga ihatag sa Ginoo. Dili kita angay nga masina sa grasya sa ubang mga tawo tungod kay sila ato mang mga igsoon diha ni Kristo. Ang ilang kadaogan ato usab nga kadaogan, ug ang ilang kalipay ato usab nga kalipay. Igo na para kanato ang kamatuoran nga kitang tanan gihigugma sa Dios.
Karong adlawa gihagit kita nga maghupot sa hiyas sa pagkamapasalamaton ug sa pagpakigbati. Una sa tanan, pasalamatan nato kanunay ang Ginoo sa mga grasya nga iyang gihatag kanato sa matag adlaw, apil na ang kahigayonan nga makaalagad Kaniya ug sa isigkatawo. Ug ikaduha, maningkamot kita sa pagpakigduyog sa atong mga silingan, dili lang sa panahon sa kalipay kondili usab sa kapait ug kalisdanan.
