Lucas 4:31-37
Tinuod ba nga adunay mga daotang espiritu? Kinsa man ang gahimo kanila? Ang Simbahang Katoliko nagtudlo nga adunay mga daotang espiritu nga gipangulohan sa usa ka demonyo, nga gitawag og Satanas. Kini sila kauban sa mga anghel sa langit nga gihimo sa Dios aron mag-alagad Kaniya. Sa sinugdan, ang tanang espiritu puno sa grasya ug malipayon nga nakig-uban sa Ginoo. Apan, tungod sa garbo, usa ka pundok sa mga anghel ang mirebelde batok sa Dios. Diha sa libro sa Pagpadayag, gihulagway ang usa ka dakong gubat taliwala sa kampo sa Dios ug sa grupo ni Satanas (12:7-9). Sa maong panagbugno, migula nga mananaog ang kampo sa kahayag nga gipangulohan ni San Miguel Arkanghel. Pero hangtud karon, ang kampo sa daotang espiritu nagpadayon sa pagpakigbatok sa Dios. Sila ang kanunay magtintal sa mga tawo nga magpakasala batok sa Ginoo.
Matag higayon nga si Jesus makahibalag og tawo nga gisudlan sa daotang espiritu, siya molihok aron sa pagpalingkawas sa tawo gikan sa gahum sa demonyo. Duha ka importanteng butang ang atong masayran gikan sa ebanghelyo mahitungod niini: Una, ang mga daotang espiritu nakaila kaniya nga balaang Anak sa Dios. Ug ikaduha, ang mga daotang espiritu mapapahawa pinaagi sa gahum sa pulong ni Kristo.
Karong adlawa, kita gihagit sa ebanghelyo nga maghupot sa hiyas sa pagkamaayo. Magpabilin kita sa kampo sa mga matarong ug makig-uban ni Kristo sa pagpakigbatok sa mga daotang espiritu dinhi sa kalibutan. Importante kaayo nga magmatngon kita sa kanunay sa presensya ug lihok sa mga daotang espiritu sa atong palibut aron nga masayod kita asa ug unsaon nato sa pagpakigbatok kanila. Dili kita angay nga mahadlok tungod kay nasayod kita nga ang mga daotang espiritu mahadlok sa mga tawo nga matarong ug magdala sa mga Pulong ni Kristo.
