Mateo 25: 1-13
Ang sambingay sa Napulo ka Dalaga maoy pamaagi sa magsusulat sa ebanghelyo sa pagpasidaan mahitungod sa posibleng pagkalangan sa pagbalik ni Kristo sa kalibutan. Puno sa larawan kining maong estorya. Ang pamanhonon mao si Kristo ug ang pangasaw-onon mao ang Simbahan. Ang napulo ka dalagang tigtagad sa kasal mao ang maghulagway sa tanang mga sakop sa Simbahan. Ang lana maoy larawan sa mga maayong binuhatan sa tawo.
Ang lampara nga walay lana tabla ra sa pagtoo nga walay buhat – wala kini kapuslanan. Si Kristo nagsaway sa mga magtutudlo sa Balaod ug sa mga Pariseo tungod kay ang ilang pagtoo sa Dios wala ubani sa buhat sa gugma ug kalooy. Sama sila sa mga dalaga nga walay dalang reserba nga lana. Sa adlaw sa paghukom, mawad-an sila sa kahayag ug masirhan sa Gingharian sa Langit.
Ang pagpaabut dili sayon, ilabi na kon ang gipaabut wala magsulti kon kanus-a gayod siya mag-abot. Ang ebanghelyo karon magsilbi nga usa ka hagit kanato sa pagbaton og mga hiyas sa pasensya ug pagkamaandamon. Manundog kita sa mga maalamon nga dalaga nga magdala og igong gidaghanon nga lana o maayong binuhatan aron nga sa pagbalik sa Ginoo maabtan kita nga may suga ug makauban kaniya sa Langit.
