Lukas 4:16-30
Ang pinakasentro sa mensahe ni Jesus mao nga ang Maayong Balita, una sa tanan, iyang gidala para sa mga kabos ug dinaugdaog: “Gidihogan ako aron pagdala sa Maayong Balita ngadto sa mga kabos, pagsangyaw og kagawasan sa binilanggo, paghatag og kahayag sa mga buta ug kagawasan sa mga dinaugdaog. . .” Daghang sa mga kadagkoan sa Israel ang dili makadawat niini tungod kay nagtoo man sila nga ang kabos gipanghimaraot sa Ginoo tungod sa bisan unsang rason. Ang dato ra ang gibendisyonan sa Dios.
Sa iyang ministeryo publiko, gipakita ni Jesus ang kadako sa iyang pagbati para sa mga kabos, mga masakiton, ug mga makasasala. Kini sila ang mga tawo nga nag-antos sa lain-laing matang sa pagkabilanggo, sama sa kapobrehon, sa sakit ug, labaw sa tanan, sa sala. Tungod sa mga buhat ni Jesus, kining mga tawhana nahatagan og dakong paglaum ug kahayag sa ilang kinabuhi.
Karong adlawa, ang ebanghelyo naghagit kanato nga maghupot sa hiyas sa gugma para sa mga kabus ug timawa. Kon kita karon naglisud sa atong kinabuhi, angay kita nga magpabiling malaumon tungod kay ang Ginoo nagpakabana sa atong kahimtang. Ug kon kita karon nagrasyahan sa daghang butang, angay kita nga molihok para sa kagawasan ug kaayohan sa mga tawong nabilanggo sa kasakit ug kalisud.
