Mateo 23: 27-32
Dili nato ikalimod nga aduna kitay mga gipangtagoan sa atong kaugalingon sama pananglit sa atong mga kahuyang ug mga kasaypanan. Kanunay kitang magpakaaron-ingnon tungod kay mahadlok kita nga dili na respetohan o higugmaon sa uban kon mahibaloan nila ang atong tinuod nga kolor o pagkatawo. Nga sa ato pa, aduna usab kitay pagkapariseo og binuhatan.
Sa iyang kinabuhi, si Jesus naghatag og dakong pagtagad sa unsay kabubut-on sa Dios Amahan, dili sa unsay ikasulti sa ubang mga tawo kaniya. Gani sa iyang pagsunod sa kagustohan sa Langitnong Amahan, daghang mga tawo ang nasuko kaniya. Apan wala niya kini tagda tungod kay para kang Jesus mas bilihon ang makita sa Dios kaysa mahinungan sa tawo.
Ang ebanghelyo nag-awhag kanato sa paghupot sa hiyas sa pagkamatinud-anon. Makatago kita gikan sa mga mata sa tawo apan dili sa Dios tungod kay makakita man Siya sa unsay naa sa atong kahiladman. Di bale kon dili na kita daygon sa mga tawo, basta lamang limpyo ang atong konsensya atubangan sa Ginoo.
