Mateo 23: 23-26
Sa pagtulun-an ug sa buhat, si Jesus nagpakita og dakong gugma ug kalooy sa mga makasasala. Ang iyang kasingkasing andam sa kanunay nga mohatag sa pasaylo ug kaluwasan. Apan, ngano nga lahi man ang pagtratar ni Jesus sa mga magtutudlo sa Balaod ug sa mga Pariseo kaysa ubang mga makasasala? Ngano nga bug-at man ang tono sa Iyang mga pulong para kanila?
Sa ilang panahon, ang mga magtutudlo sa Balaod ug mga Pariseo giila sa mga tawo nga tigpanguna sa ilang kinabuhing moral ug espiritwal. Gitahud ug gihangad sila sa mga tawo dili lamang sa mga sinagoga kondili bisan diha sa kadalanan ug merkado. Tungod niini, kadaghanan kanila nahimong garboso ug mibati nga dili na masayop. Nakita ni Jesus kanila ang kakulang sa pag-angkon sa sala ug sa kagustohan nga magbasol sa tinuoray. Ang paggamit og mga pulong nga bug-at maoy paagi ni Jesus sa pagpukaw sa galamhan aning mga tawhana.
Karong adlawa kita gihagit nga magbaton sa hiyas sa pagkamahinulsulon. Dawaton nato nga kita makasasala ug may dakong panginahanglan sa kalooy sa Dios. Pangayoon nato sa Ginoo ang iyang pasaylo sa atong mga sala nga nahimo ug ang dugang grasya sa kaikag nga musunod sa mga lakang sa Iyang Anak nga si Jesus.
