Mateo 25:14-30
Pinaagi sa Sambingay sa mga Talento si Kristo nagpahinumdum kanato nga ang tanan natong kapasidad o talento nagagikan sa Ginoo. Gihatag kini kanato dili aron atong tagoan kondili aron atong gamiton sumala sa tumong sa naghatag niini. Ang importante dili ang gidak-on ug gidaghanon sa talento nga atong nadawat kondili ang matang sa atong paggamit niini. Sa adlaw sa paghukom, ang Dios mangayo sa matag usa kanato og kwentada sa mga bunga sa iyang nahatag kanato nga mga talento.
Si Jesus maoy atong modelo sa saktong paggamit sa mga talento. Ang iyang mga abilidad, sama sa pagtudlo ug pag-ayo sa mga sakit, iyang gigamit dili alang sa iyang kaugalingong kabulahanan kondili alang sa kaayohan sa ubang mga tawo. Ang ebanghelyo wala gyud maghisgot, bisan kausa man lang, nga si Kristo miangkon og usa ka butang para sa iyang kaugalingon lamang. Sa pagkatinuod, ang tanang gahum ug kapasidad nga naa kaniya iyang gipaambit ngadto sa iyang mga tinun-an.
Karong adlawa gihagit kita sa pagpalambo sa hiyas sa pagkamaayong piniyalan. Hatagan nato og dakong bili ang matag talento nga atong nadawat gikan sa Dios pinaagi sa pag-amping ug pagpalambo niini. Ikalipay og dako sa Ginoo kon atong magamit ang atong mga talento alang sa kaayohan sa isigkatawo ug sa tibuok niyang Simbahan.
