Lucas 6:39-42
“Makaagak ba diay ang buta sa laing buta? Dili ba mahulog hinuon ang duha sa kanal?” Pinaagi niining mga pangutana, gipasabot ni Jesus ang kabililhon sa usa ka klaro ug moral nga panan-aw sa kinabuhi. Ang tawo nga wala matudloi sa moral nga pamuyo o sakto nga pamatasan dili usab makatudlo sa laing tawo mahitungod sa matarong nga kinabuhi. Ang tawo nga wala magpuyo og moral nga kinabuhi, bisan tuod nasayod siya unsa ang sakto, dili usab makagiya sa laing tawo tungod iyang daotang ehemplo.
Kon gusto kita nga makatudlo o makaagak og laing tawo (kapikas, anak, higala, o silingan) sa husto nga dalan, kinahanglan nga maghupot kita og klaro nga panan-aw, spiritwal ug moral. Unsa may atong buhaton aron makabaton kita og panan-aw nga sama niini? Si Kristo mao ang pinakamaayo nga magtutudlo sa moral nga kinabuhi. Angay gayod nga atong ilhon ang iyang pagkatawo ug ang iyang mga pagtulun-an pinaagi sa pagbasa, pagtoon ug pagpamalandong sa mga pulong sa ebanghelyo. Makakuha gihapon kita og klarong panan-aw pinaagi sa pagpaminaw sa tambag ug hunahuna sa mga matarong nga tawo. Busa, bililhon kaayo nga adto kita makig-uban ug makighigala sa mga tawo nga nagsunod sa moral nga kinabuhi.
Ang hagit para kanato karong adlawa mao ang paghupot sa hiyas sa kahibalo mahitungod sa moral nga kinabuhi tungod kay pinaagi niini makatultol ug makatudlo kita sa husto nga dalan padulong sa kinabuhing walay katapusan.
