Lucas 8:19-21
Ang mga pulong ni Jesus diha sa ebanghelyo karong adlawa dili maisip nga panginsulto sa iyang inahan ug pamilya. Nasayod kita nga si Jesus nagpabilin nga masinugtanon sa iyang mga ginikanan. Sa iyang pag-ingon, “Ang akong inahan ug mga igsoon mao sila nga naminaw sa pulong sa Ginoo ug nagtuman niini”, buot lamang ni Jesus nga isipon nga kapamilya ang mga tawo nga matinud-anon sa ilang pagtoo sa Dios.
Aron mahimong sakop sa banay sa Dios, ang tawo angay nga magbuhat sa duha ka bililhong butang: una, ang pagsabut sa kabubut-on sa Dios ug, ikaduha, ang pagpuyo niini. Atong makat-onan ang kabubut-on sa Dios pinaagi sa pagbasa, pagtoon ug pagpamalandong sa Balaang Kasulatan ug ang mga pagtulun-an sa Simbahan. Ug, mamahimo kitang tinuod gayud nga sumusunod kon atong sugdan pagpuyo ang kabubut-on sa Ginoo.
Ang atong hagit karong adlawa mao ang pagbaton sa hiyas sa pagkamatinud-anon sa kabubut-on sa Dios. Likayan nato nga mahimong Kristiyano sa ngalan lamang pinaagi sa pagbuhat sa ginasugo sa ebanghelyo matag adlaw sa atong kinabuhi. Sayran nato nga ang pagtoo nga walay buhat dili bililhon atubangan sa Ginoo.
