Lucas 9:7-9
Ang atong Simbahan nagtudlo kanato nga matag tawo adunay konsensya. “Diha sa kasingkasing sa tawo adunay balaod nga gisulat sa Ginoo. Ang pagtuman niini maoy usa ka pagmatuod sa tawhanong dignidad; gikan niini ang tawo pagahukman” (Gaudium et Spes, 16). Ang pagkaanaa sa konsensya gipamatud-an usab ni San Pablo sa dihang siya miingon nga bisan ang mga walay pagtoo makabuhat sa gisugo sa Balaod tungod kay ang mga sugo sa Balaod napatik sa ilang salabutan (Roma 2:14).
Ang tawo nga magbuhat og daotan dili magmalinawon tungod kay pagahasolon man siya sa iyang tanlag. Mao kini ang gibati ni Herodes diha sa ebanghelyo karon. Sa dihang nakadungog siya mahitungod sa mga gipangtudlo ug gipangbuhat ni Jesus, nahinumdum siya ni Juan nga iyang gipapunggutan sa ulo. Nahasol ug nalibog siya tungod kay ang mga tawo nag-ingon nga si Jesus mao si Juan nga nabuhi gikan sa kamatayon. Sa laing bahin, ang Simbahan nagtudlo nga ang limpyo nga konsyensa maoy magdala og kalinaw ug kalipay sa tawo. Ato kining mapatud-an diha sa atong mga kasinatian.
Karong adlawa kita gihagit nga maghupot sa hiyas sa matarong nga konsyensa. Amomahon ug edukaron nato ang atong tagsatagsa ka konsensya pinaagi sa pagbasa ug pagpaminaw sa mga pagtulun-an sa Simbahan. Ang naandan nga pamaagi sa inadlaw-adlaw nga pagsusi sa konsensya angay nga buhaton sa matag Kristiyano. Kada adlaw, subayon nato kon sa unsang paagi kita napakyas o nakatuman sa mga sugo sa maayong konsensya. Kini mao ang sekreto sa kinabuhi nga matarong ug makahulaganon.
