Lucas 8:4-15
Kita, nga nagpakabana sa pagsangyaw sa Pulong sa Ginoo, mapahisama sa mga magpupugas. Dili kita ang makahimo og mga liso nga itanumay. Ang Ginoo maoy tag-iya ug bugtong gigikanan sa mga liso ug kita igo lamang nga modawat niini. Diha sa pag-ampo, moduol kita ni Jesus ug magpatudlo kaniya mahitungod sa ebanghelyo. Siya ang magbutang sa mga liso sa Gingharian diha sa atong tagsatagsa ka kasingkasing ug hunahuna.
Ang mga pari, madre, katekista, ginikanan, ug ubang mga magtutudlo magtanum og mga liso sa ngalan sa Ginoo. Sama kang Jesus, magsabwag kita sa mga liso sa kamatuoran sa walay pumanagana ug walay tihiktihik. Isangyaw nato ang unsay maayo ngadto sa tanan, bisan tuod dili nato masiguro kon unsa nga matang sa yuta ang anaa sa kasingkasing sa usa ka tawo. Ang Ginoo maoy magpabuhi ug magpatubo sa mga liso, dili kita. Magpupugas lang kita ug atong itugyan sa kamot sa Ginoo ang kaugmaon sa mga liso. Ang ubang mga tawo tig-a og mga kasingkasing ug mahimo ra nila nga balewalaon ang atong gitudlo. Aduna puy mga tawo nga maayo og kasingkasing ug maningkamot sila sa pagpuyo sa kamatuoran nga ilang nadunggan. Mamunga man o dili ang mga lisong gitanum, ang mga magpupugas sigurado gihapon nga makadawat sa ilang ganti gikan sa tag-iya sa umahan tungod sa ilang makugihon ug tininuod nga pagpananum.
Karong adlawa, gidapit kita nga maghupot sa hiyas sa pagkamakanunayon diha sa pagpanudlo sa Kristohanong kinabuhi. Kon ang atong mga higala, silingan, o anak dili maminaw sa atong ipangtudlo, ato silang itugyan sa Ginoo tungod kay ang Dios lamang ang adunay gahum sa pag-usab sa kasingkasing sa tawo.
