Lucas 5:1-11
Mga mananagat ang gipili ni Jesus nga mahimo niyang pinakaunang sumusunod. Siguro, tungod kini kay kasagarang mga mangingisda adunay mga hiyas nga angay para sa usa ka mensahero sa Dios. Mag-una aning mga hiyas mao ang pagkapasensyoso. Sa ebanghelyo karon, si Pedro namulong, “Ginoo, nanagat kami sa tibuok gabii, pero bisan usa ka isda wala kami nakuha.” Ang mangingisda andam nga magtrabaho sa dugay nga panahon aron lamang makakuha og isda.
Ang pagpangisda og mga tawo dili masayon nga buhat. Ang kalisud sa pagdala og tawo ngadto sa katarong atong masinati diha sa pamilya, eskuylahan, opisina ug sa katilingban. Ang tawo dugay nga makasabut ug dugay nga makakita sa kamatuoran, ilabi na kon maghari kaniya ang garbo ug ang kalibutanong panghunahuna. Tungod niini, ang usa ka mensahero sa Dios manginahanglan og dakong pasensya aron magmalampuson sa pagkabig og mga tawo ngadto sa katarong.
Ang hiyas sa pasensya gikinahanglan dili lang sa pagdani og mga tawo ngadto sa Dios kondili bisan diha sa pag-usab sa atong kaugalingon ngadto sa pagka-tinuod nga Kristiyano. Ang pagbag-o sa kaugalingon manginahanglan og taudtaud nga panahon; usahay gani ang maong proceso magpadayon hangtud sa kamatayon. Kon wala kitay pasensya ug kon wala ang grasya sa Dios dili nato makab-ot ang gipangandoy nga kausaban.
