Lucas 8:1-3
Sa iyang pagpangalagad si Jesus nagpakita og dakong pagtagad sa kahimtang ug kaayohan sa mga kababayenhan. Atong nasayran nga sa kapanahonan ni Jesus, ang mga babaye gipakaubos ug gihikawan sa daghang katungod: Wala sila tugoti nga molakaw tupad sa ilang bana diha sa dayag; gidid-an sila nga makighinabi sa usa ka tinahod nga magtutudlo diha sa publiko; ug dili sila madawat nga testigo sa mga hukmanan tungod kay ang ilang mga pulong giisip nga dili kasaligan; ug uban pa. Tungod niini, nahimong kabahin sa inadlaw-adlaw nga pag-ampo sa mga Hudeyo'ng lalaki ang pagpasalamat sa Dios nga wala sila himoa nga babaye.
Apan, sukwahi sa kultura sa mga Hudeyo, si Jesus nagpakita nga ang mga kababayenhan angay hatagan sa susamang pagtahod nga ihatag sa mga lalaki. Ang mga babaye makadawat sa grasya ug pagpasaylo sa Ginoo. Mahimo usab silang mga tinun-an o sumusunod ni Kristo. Aduna silay aktibo nga papel sa pagtukod sa Gingharian sa Dios dinhi sa kalibutan. Ug labaw sa tanan, gipili ni Jesus si Maria Magdalena, usa ka babaye, nga mahimong pinakauna nga magsasangyaw sa balita mahitungod sa dakong misteryo sa Pagkabanhaw. Siya, nga gitoohan nga dili masaligan sa pulong, gihatagan ni Jesus og gahum nga magsangyaw sa maayong balita mahitungod sa iyang kadaogan batok sa gahum sa daotan.
Karong adlawa, kita gihagit nga magbaton sa hiyas sa pagkamatinahoron sa mga kababayenhan. Likayan nato ang mga hunahuna, lihok og pamatasan nga makapaubos sa dignidad sa mga babaye. Ang bantogan nga Santo Papa, Juan Pablo Dos, nagkanayon: “Sa matag higayon nga daoton sa tawo ang dignidad sa mga kababayenhan, tabla ra nga iyang gipakaubos ang iyang kaugalingon ug ang iyang bokasyon” (Mulieris Dignitatem, 10).
