Lucas 6:1-5
Usa sa Napulo ka Sugo sa Dios mao ang pagbalaan sa Adlaw nga Igpapahulay (Exodo 20:8; Deuteronomio 5:12). Unsa man ang katuyoan sa maong balaod? Una, ang Adlaw nga Igpapahulay maoy panahon nga gigahin para nga kita makasimba ug makapasalamat sa Dios sa iyang dakong kaayo nga makita ug mabati diha sa iyang makanunayong pagpanggama ug pagpangluwas dinhi sa kalibutan. Ug ikaduha, kining maong adlaw gigahin para nga kitang mga tawo ug ang kinaiyahan mahatagan og kahigayonan nga makapahulay para sa atong kinatibuk-ang kaayohan.
Diha sa ebanghelyo karon, ang mga Pariseo mireklamo kang Jesus tungod kay ang iyang mga sumusunod nagtrabaho panahon sa Adlaw nga Igpapahulay pinaagi sa pagpangutlog mga uhay sa trigo ug pagkusokuso niini sa ilang mga kamot. Agi og tubag sa maong reklamo, si Jesus migamit sa Balaang Kasulatan aron pagpapasabot nga ang tawhanong panginahanglanon angay ipatigbabaw kaysa balaod. Tungod sa kagutom, si David ug ang iyang mga tawo mikaon sa pan nga hinalad sa templo bisan kon kini supak sa balaod (1 Samuel 21:2-7).
Karong adlawa, gidapit kita nga maghupot sa hiyas sa pagkamaalamon sa mga sugo sa Dios. Maningkamot kita sa pagsabot sa katuyoan sa matag sugo sa Ginoo aron nga dili kita mahisama sa mga Pariseo nga magpugos sa pagpatuman sa usa ka balaod bisan kon kini dili na makatabang sa tawo.
