Lucas 4:38-44
Tulo ka lihok ni Jesus diha sa ebanghelyo karong adlawa ang angay makat-onan sa tanang mga sumusunod ni Kristo. Una, iyang giayo ang ugangan ni Pedro sa grabe nga hilanat, ug human niini, iya usab nga gihatagan og kaayohan ang tanang masakiton nga gidala sa mga tawo ngadto kaniya. Ang usa ka Kristiyano angay usab nga maghupot sa hiyas sa pagkamananambal aron makahatag og kaayohan sa mga tawo nga adunay balatian sa lawas ug kalag. Pipila lamang kanato ang doktor sa lawas, apan matag usa kanato adunay kapasidad sa paghatag og paglaum, kadasig ug kabaskog sa tawo nga nagluya tungod sa sakit.
Ikaduha, human siya magtrabaho para sa kaayohan sa mga tawo, si Jesus miadto sa usa ka mamingaw nga dapit aron sa pag-ampo. Bisan sa daghang trabaho, si Jesus mangita gayod og panahon ug lugar nga makighinabi sa iyang Amahan nga atua sa langit. Ang usa ka sumusunod ni Kristo angay usab mahimong maampoon. Diha sa pag-ampo, mapahinumduman kita nga ang tanang butang – kinabuhi, pamilya, talento, trabaho, bahandi, bokasyon, ug uban pa – grasya sa Dios. Kon wala ang Ginoo, wala kitay mahimo.
Sa katapusan, sa dihang gipugngan siya sa mga tawo sa Capernaum, si Jesus miingon: “Muadto usab ako sa laing mga dapit aron sa pagsangyaw sa Maayong Balita tungod kay kini mao ang tahas para kanako.” Para kang Jesus, ang pagdayeg sa mga tawo ug ang hamugaway nga kinabuhi dili angay nga makababag sa iyang misyon para sa kalibutan. Sa samang paagi, ang usa ka Kristiyano angay nga mahimong malangkobon sa iyang gugma. Isangyaw niya ang gugma sa Dios dili lamang sa iyang pamilya ug mga kahigalaan kondili ngadto sa tanang katawhan nga iyang ikahibalag tungod kay sila usab angay nga makabati sa gugma ug pag-amoma sa Dios.
