Lucas 9:1-6
Diha sa ebanghelyo karon, gihatagan ni Jesus og kusog ug gahum ang mga apostoles sa pagsumpo sa mga daotang espiritu, pag-ayo sa mga masakiton ug pagsangyaw sa Gingharian sa Dios. Talagsaon ug nindot kaayo kining gihimo ni Jesus nga paghiusa sa ideya kabahin sa “gahum” ug sa “mahigugmaong pagpangalad”. Para sa Dios, ang gahum ug kusog angay gamiton dili sa pagpanaogdaog ug pagpangaway kondili sa pag-ayo ug paghatag og kinabuhi. Usa kini ka maayong pahimangno tungod kay daghan kanato karon mogamit sa gahum sa daotang paagi ug para sa personal nga kaayohan lamang.
Gipahimangnoan ni Jesus ang mga apostoles nga dili magdala og daghang mga butang sa ilang pagsangyaw sa Maayong Balita. Ang materyal nga mga butang, bisan tuod makatabang, mahimo usab nga sagabal sa ilang pagpangalagad. Ang mga apostoles angay nga mobutang sa ilang dakong pagsalig ngadto sa kaayo ug panabang sa Dios. Maayo usab kini nga pahinumdum kanato tungod kay sa daghang panahon mopatigbabaw ang atong dakong kaibog sa mga kalibutanong butang. Gani, tungod sa atong pagpaningkamot nga makab-ot ang mga butang nga atong gipangandoy, mogamay na ang atong panahon para sa Ginoo ug para sa atong mga mahal sa kinabuhi.
Ang hagit para kanato karong adlawa mao ang paghupot sa mga hiyas sa pagkayano ug pagkamasaligon sa Dios. Pasalamatan nato ang Ginoo sa mga grasya nga atong nadawat gikan kaniya – butang, kahibalo ug talento. Ato silang gamiton dili lang para sa atong kaugalingong kalipay kondili para usab sa kaayohan sa uban.
