Lucas 8:16-18
“Walay magdagkot og suga ug unya takloban sa nigo, o kaha ibutang ilalom sa higdaanan. Hinunoa, ibutang kini sa tungtunganan aron makita sa mosulod ang kahayag.” Pinaagi niining maong pagtulun-an, si Jesus nag-awhag kanato sa pagpadayag sa atong gitoohan ngadto sa tanang katawhan pinaagi sa pulong ug sa buhat. Magpakita kita sa atong maayong binuhatan dili aron nga kita daygon kondili aron nga kita makahatag og maayong ehemplo ngadto sa ubang mga tawo.
Si Jesus mao ang kahayag nga gipadala sa Langitnong Amahan aron maghatag og kalamdag sa kalibutan. Pinaagi sa iyang pagkatawo ug sa kinabuhi sa pag-alagad nga iyang gipuy-an, ang mga tawo nahatagan og maayong panig-ingnan sa usa ka kinabuhi nga dalaygon ug Diosnon.
Ang hagit sa ato karon mao ang pagpuyo sa kinabuhi nga mahigugmaon ug maalagaron. Pinaagi niining mga hiyas nga Kristohanon, kita mahimong usab nga mga modelo para sa sa atong mga igsoon, mga anak, kahigalaan ug kasilinganan.
