Lucas 6:12-19
Ang ebanghelyo karon nagsaysay sa pagpili ni Jesus sa iyang 12 ka mga apostoles. Nindot kaayo palandungon nga sa wala pa niya pilia ang iyang unang mga magsasangyaw, si Jesus migahin og usa ka gabii didto sa usa ka mamingaw nga bukid aron sa pag-ampo.
Sa iyang kinabuhi, daw nabatasan na ni Jesus nga makigstorya o mokonsulta sa iyang Langitnong Amahan sa dili pa siya maghimo og dagkong mga lakang. Atong masayran nga sa wala pa siya magsugod sa iyang ministeryo publiko, si Jesus miadto sa desierto aron mag-ampo. Sa iyang pagpangalagad, naandan usab niya nga mogahin og panahon para mag-ampo. Unya, sa wala pa siya muatubang sa labing dako ug pinakasakit niyang hagit, miadto usab siya sa tanaman sa Gethsemane aron makigstorya sa iyang Amahan.
Kining ebanghelyo nagdasig kanato nga maghupot sa hiyas sa pagkamaampoon. Unsa man kining pag-ampo? Ang pag-ampo usa ka mahigugmaong pagpakigstorya sa Ginoo. Si Jesus nagtudlo kanato sa pagsangpit sa Dios isip atong Amahan o Higala. Diha sa pag-ampo, magdayeg ug magpasalamat kita sa Dios, ug mokunsulta Kaniya kabahin sa atong mga plano ug suliran sa kinabuhi kay Siya man ang labing maalamon sa tanan.
